المرحُوم
*******
فِ لحظه بعد ثانيه
بَات الإنسان مَرْحُوم
مات وسَاب الدُنيا
والوِرْث كان همُوم
راح لِ..دُنيا تانيه
فيها الحِسَاب معْلُوم
الصُوت مات صدَاه
تحت الكفن مكتُوم
ضعفُه عدّى مدَاه
بات ضَعِيف موهُوم
اللّى بدمُه بَنَاه
بعد الرَحِيل مهدُوم
فَات أهلُه ونَاسُه
خلاص بقى محروم
فات دَهبُه وكَاسُه
قَسّموا حتّى الهِدُوم
القوّه راحت فين
ماقادِر حتّى يقُوم
بقَى ذكرى وعدّت
تحت التراب مَلْمُوم
ومهما يهرب بعيد
الموت عليه محتُوم
أوعى يُغرّك مُلْكَك
مَفِيش مُلك بِيدُوم
وعِيش مهمَا تِعيش
كأنك ماعِشت يوم
كان الإسم (عايش)
بقى اللقب (مرحوم)
بقلم / سيد عبدالوهاب
ليست هناك تعليقات:
إرسال تعليق